سعید خاور آپ کو سندھ اور صحرائے تھر کے سفر پر اپنے ساتھ لیے چلتے ہیں۔ ان کی اس کتاب میں سندھ جیسے قدیم تہذیبی خطے کا رومانوی تعارف تو ہے ہی، وہاں کے اعصاب شکن معاملات و مسائل کا بھی بہت بےباک تذکرہ ہے۔ آپ کو اس موضوع پر شاید اس سے بہتر کتاب مل ہی نہیں سکتی۔ پڑھیے جناب، پڑھیے۔

عرفان احمد نے کیا ہی شاندار کتاب مرتب کی ہے، آنسٹلی! اس کتاب میں آپ کو پاکستان کے جانے پہنچانے لوگوں کی مطالعہ کی عادات کا تعارف ملتا ہے: ڈاکٹر اسلم فرخی، زاہدہ حنا، ڈاکٹر مبارک علی، مولانا زاہد الراشدی اور دیگر کئی۔ یہ بہت دلچسپ اور خیال کو تر کرنے والی کتاب ہے۔ آپ کو لازما پڑھنا چاہیے۔

ڈاکٹر انور سدید پاکستان کے مشہور نقاد و صحافی رہے ہیں۔ انکی زندگی قلم و کتاب سے وابستہ رہی۔ یہ ادبی شخصیات کے شخصی خاکوں پر مبنی ان کی دوسری کتاب ہے۔ پڑھیں گے تو حمید اخبر، سجاد نقوی، شفقت تنویر مرزا کے علاوہ اور بہت سی ادبی شخصیات کے بارے میں جانیں گے۔ پڑھیں جناب۔

ڈاکٹر انور سدید پاکستان کے مشہور نقاد و صحافی رہے ہیں۔ انکی زندگی قلم و کتاب سے وابستہ رہی۔ اس کتاب میں انہوں نے اپنی زندگی کے مشہور لوگوں کے شاندار خاکے تحریر کیے ہیں۔ آپ ان کی اس کلیکشن میں شان الحق حقی، طاہر لاہور، شریف کنجاہی کے علاوہ اور بہت سی ادبی شخصیات کے بارے میں جانیں گے۔ پڑھیں جناب۔

یہ منیر نیازی مرحوم کی خوبصورت باتوں اور یادوں کی کتاب ہے جو ان کی محبت میں تنویر ظہور نے لکھی۔ یہ کتاب آپ کو اس لیجنڈری شاعر کا بھرپور تعارف فراہم کرے گی۔ پڑھیے، پڑھتے رہیں۔

اس کتاب میں مسعود مفتی اپنے دوستوں کا ذکر کرتے ہیں جنہوں نے پاکستانی ادب پر اپنے انمٹ نقوش چھوڑے۔ ذرا نام تو پڑھیے: فراز، قاسمی، جعفری، بخاری، منٹو، صدیقی، آصف فرخی، آغا ناصر اور دیگر کئی ایسے جو پاکستانی اردو ادب پر مسلسل محسن رہے۔ یہ پڑھنے والی کتاب ہے صاحبان۔ پڑھنے والی۔

مسعود مفتی بیوروکریٹ رہے اور افسانہ نویسی کے ساتھ ساتھ پاکستانی سیاست پر بھی قلم اٹھاتے رہے۔ یہ کتاب مشرقی پاکستان کے بنگلہ دیش بن جانے کی کہانی ہے جس میں حمودالرحمن کمیشن کی رپورٹ کے اہم حصے بھی نقل کیے گئے ہیں۔ سیاست و تاریخ کے شوقین، ہر پاکستانی کو یہ کتاب لازما پڑھنی چاہیے۔

فاروق عادل صاحب پاکستان کے نہایت ہی تجربہ کار اور سئنیر سیاسی صحافی رہے ہیں۔ اس کتاب میں انہوں نے پاکستانی سیاست و معاشرت کے جانے پہچانے ناموں کے خاکے تحریر کیے ہیں جن سے ان کی ملاقاتیں رہیں۔ میاں طفیل، نصرت بھٹو، قاضی حسین احمد، ائیرمارشل اصغر خان اور بہت سے دیگر۔ یہ بہت پرلطف پڑھنے والی کتاب ہے۔

یہ اشرف شاد صاحب کی تحریر کردہ یادگار کتاب ہے جس میں آپ پاکستانی سیاسی و سماجی تاریخ کی اہم شخصیات کے بارے میں پڑھیں گے۔ اس میں ان کے انٹرویوز ہیں اور شاد صاحب کے مضامین بھی۔ بینیظر بھٹو، جنرل ضیاءالحق، عطا اللہ مینگل، الطاف حسین، ایدھی اور بہت سے دیگر۔ پڑھنے کی شے ہے جناب۔

پڑھیے رؤف کلاسرہ کے قلم سے پاکستانی سیاست کے مرکزی کرداروں کے بارے میں اور پاکستانی سیاست کے بارے میں بھی کہ درون خانہ یہ کیسے چلتی ہے۔ چوہدری شجاعت، جنرل علی قلی خان، آفتاب احمد شیرپاؤ، آصف علی زرداری اور بہت سے دیگر سیاسی کرداروں کے بارے میں جانیے۔ پڑھنے والی کتاب ہے جناب۔

یہ جسٹس سید افضل حیدر کا خوبصورت محبتی بیان ہے، جناب حضرت میاں علی محمد خان (بسی شریف، ہشیار پور، انڈیا اور پھر پاک پتن شریف کے بارے میں۔ اس کتاب میں چشتیہ سلسلہ کے اِن بزرگ کے احوال و معمولات کا ذکر ہے۔ یہ روحانی محبت میں ڈوبی ہوئی بہت دھیمے مزاج کی کتاب ہے۔ پڑھیے جناب۔

یہ یونس جاوید صاحب کی مختصر آپ بیتی ہے اور انہوں کی کسی بھی قسم کی لگی لپٹی رکھے بغیر لکھ دی ہے۔ یہ بہت حقیقی اور کہنے دیجیے کہ پاکستانی معاشرتی نارمز کے پس منظر میں، اک ڈسٹرب کرنے اور چپھنے والی سچی کتاب ہے۔ آپ بہت سے مشہور لوگوں کے چھپے گوشے جان پائیں گے۔ پڑھیے؛ یاد رکھیں گے۔

شاہد صدیقی صاحب پاکستانی صحافت کے جانے پہچانے نام ہیں۔ یہ ان کے مضامین پر مبنی کتاب ہے جو آپ کو ان کے صحافیانہ سفر پر اپنے ساتھ لیے جائے گی۔ یہ ان کے ان حالات کے مشاہدات بھی ہیں جو انہوں نے خود پر بیتے ہوئے محسوس کیے یا ان میں سے گزرے۔ پڑھنے والوں کے لیے تحفہ ہے یہ کتاب۔

تارڑ صاحب کے سفرنامے بھی ادبی ٹچ لیے ہوتے ہیں اور انہیں پڑھنے والا ان کے ساتھ ساتھ ان جگہوں کی سیر تو کرتا ہی ہے، ان کے ایکسپریشن کا لطف بھی ساتھ ہی اٹھائے چلے جاتا ہے۔ کیا آپ ان کے ساتھ ویت نام جانا چاہیں گے؟ کیوں نہیں بھئی! تو پھر پڑھیے جناب۔

اپنے شہر سے محبت کیسے کی جاتی ہے؛ اس کی جگہوں اور لوگوں کو عین اسی محبتی نظر سے کیسا دیکھا جاتا ہے؛ طاہر لاہوری کی یہ کتاب آپ کو بتا دے گی۔ اپنے نام کے ساتھ اپنے شہر کی شناخت جوڑے لکھاری نے لاہور کو جس محبت سے بیان کیا ہے، اپنے شہر، قصبے اور گاؤں سے محبت کرنے والے ہر کسی کو پڑھنا چاہیے۔ پڑھیے جناب۔

تارڑ صاحب آپ کو کمبیوڈیا لیے چلتے ہیں۔ آپ کو بھی ان کے ساتھ، وہاں جائے بغیر جانے کا اک موقع مل رہا ہے تو آپ جاتے کیوں نہیں؟ پڑھیں اور ان کے ساتھ کمبوڈیا کی تاریخ، معاشرت، لوگوں، ثقافت، تاریخی مقامات، رسوم اور رواج کے بارے میں جان جائیں تارڑ صاحب کی کیا ہی بات ہے!

یہ آصف فرخی مرحوم کے سفر کا بیان ہے جو انہوں نے انتظار حسین مرحوم کے ساتھ کیا جب وہ دنیا کے اک مشہور ادبی میلے "مین بکرز پرائز" میں شرکت کے لیے جاتے ہیں۔ آصف اس قصے کو ایسے بیان کرتے ہیں کہ یہ محض اک سفرنامہ کی روئیداد نہیں رہتا، اک تخلیقی معاملہ بن کر قاری کے سامنے آ جاتا ہے۔ پڑھیے دوست، پڑھیے۔

تارڑ صاحب کی پاکستان کے شمالی علاقہ جات سے محبت بہت پرانی ہے۔ وہ تو اپنی پرانی سوزوکی ایف ایکس پر اک دن وہاں جا پہنچے تھے۔ یہ مگر بہت پہلے کی بات ہے۔ انہوں نے گلگت بلتستان کو پاکستانیوں سے جیسے متعارف کروایا ہے، شاید ہی کسی اور نے کروایا ہو۔ یہ ان کا ویسا ہی اک سفر نامہ ہے۔ پڑھیے اور لطف لیجیے۔

لاہور کی پاپولر تاریخ پر یہ کیا ہی عمدہ کتاب ہے۔ مجید شیخ کی لاہور سے محبت بہت پرانی ہے اور وہ اس شہر کے چھپے ہوئے گوشوں اور دھندلائی ہوئی تاریخ پر بہت عرصے سے لکھ رہے ہیں۔ یہ کتاب آپ کو اک ایسے لاہور سے روشناس کرواتی ہے جس کو آپ شاید ہی جانتے ہوں، حتی کہ آپ بھلے اک "لہوری" بھی ہوں۔ پڑھیے جناب۔

آہا؛ یہ وہ تحاریر ہیں جو آپ کو ماضی میں دفن ان گنت یادوں، لوگوں اور تاریخ سے اک بار پھر متعارف کروا دتیی ہیں۔ آپ شاہد صدیقی کی اس کتاب میں بھنبھور جاتے ہییں، ٹیکسلا کو پھر سے جانتے ہیں، قلعہ روہتاس کو چھانتے ہیں، دریائے سندھ اور بدھسٹ سلطنت، ہنڈ کو بھی پڑھتے ہیں۔ یہ شاندار پڑھنے والی کتاب ہے جناب۔

یہ کتاب آپ کو چونکا دے گی جب آپ جنوبی پنجاب کے بڑے سیاسی اور زمیندار گھرانوں کی تاریخ کی اصلیت جانیں گے تو۔ یہ مختصر کتاب اک مستند تاریخ بھی ہے اور حوالہ جات سے اپنے موضوع کے ساتھ مکمل انصاف کرتی ہے۔ پاکستانی سیاست میں دلچسپی رکھنے والے ہر شخص کو یہ کتاب لازما پڑھنی چاہیے۔ تو پڑھیں ناں دوست!

آپ کو اردو میں ایسی کتب بہت کم پڑھنے کو ملتی ہونگی جو مظہر سعید قریشی صاحب نے آپ کے لیے تحریر کر دی ہے۔ یہ ان کے ذاتی مشاہدات و تجربات کی تحاریر ہیں جو ان کے ساتھ بیت جانے والے مافوق الفطرت اور ماورائے عقل واقعات کا احاطہ کرتی ہیں۔ یہ پڑھیے کہ ایسی تحاریر اردو میں بہت کم لکھی گئی ہیں۔

سہیل پرواز صاحب نے اپنا ذاتی دکھ اور اپنا سینہ اپنے قاری کے سامنے کھول کر رکھ دیا ہے۔ یہ ان کی شریک حیات، محترمہ رخسانہ مرحومہ کے تذکروں پر مبنی کتاب ہے جن سے جدائی کا خیال لکھاری کے ذہن میں کبھی بھی کہیں بھی نہیں تھا۔ یہ مرحومہ کا محبتی بیان تو ہے ہی، اس میں سیکھنے کو بھی بہت کچھ ہے۔ پڑھیے جناب۔

قیصر عباس صابر اردو سفرنامہ نگاری کو آگے بڑھانے والوں میں اک نمایاں حیثیت اختیار کر چکے ہیں۔ تارڑ کے اسلوب پر ان کا مگر اپنا یونیک بیان ہے۔ یہ ان کے شمالی علاقہ جات کے سفر کی جھلک ہے جہاں صرف مقام اور لوگ ہی نہیں، ان کا لطیف بیان بھی ان کے اپنے الفاظ میں موجود ہے۔ پڑھیں گے تو تروتازہ ہو جائیں گے۔

تارڑ صاحب آپ کو اس بار حراموش لیے جاتے ہیں جو مواصلات کے اس دور میں بھی پہنچنے کے لیے اک مشکل جگہ ہے۔ تارڑ صاحب مگر عرصہ ہوا وہاں پہنچ گئے تھے۔ یہ کتاب آپ کو شمالی پاکستان کے ان پیارے اور خوبصورت لوگوں سے ملا دے گی جو آج بھی فطرت کی گود میں رہتے اور جیتے ہیں۔ پڑھیں گے تو جان اور مان جائیں گے۔

کیوبا ہمارے ہاں کچھ زیادہ نہیں ڈسکس کیا جاتا اور شاذ ہی جانا جاتا ہے۔ وہ مگر اپنی تاریخ، ثقافت اور رہتل رکھنے والا اک ملک و معاشرہ تو ہے ہی ناں۔ تارڑ صاحب کے ساتھ کیوبا گھوم آئیے، بہت سستے نرخوں میں جناب۔ پڑھیں گے تو بہت لطف اٹھائیں گے۔ تارڑ صاحب کی کوئی کتاب کبھی بھی مِس نہ کیا کیجیے؛ مفت مشورہ ہے!

اس کتاب میں نیلم احمد بشیر اپنی بہنوں کے خاکے لکھتی ہیں اور کیا ہی شاندار مضامین ہیں پڑھنے کو۔ اپنے ابو، احمد بشیر مرحوم کا بھی شاندار تذکرہ ہے اور کتاب کے آخر تک آپ کو ان چار بہنوں میں اپنے ابو کی شخصیت اور تربیت کے عکس ملتے ہیں۔ یہ بہت خوبصورت کتاب ہے، بہت۔ پڑھنے والی ہے جناب۔

پاکستانی سماج میں خواتین کے مقام کے حوالے سے کشور ناہید کی جدوجہد بہت پرانی ہے۔ یہ جہد کیوں ہے؛ یہ کتاب عین اس کی بنیاد آپ تک لے کر آتی ہے۔ یہ ان کی آپ بیتی ہے جو انہوں نے اپنے شاندار اور بےتکلف انداز میں بیان کر دی ہے۔ یہ پاکستانی عورت کی جہد کی دستاویش بھی ہے۔ آپ کو لازما پڑھنے چاہیے دوست۔

کشور ناہید صاحبہ کی یہ کتاب ان کے تاثرات پر مبنی ہے جو انہوں نے دنیا کے لکھاریوں اور محققین کے بارے میں تحریر کیے ہیں۔ آپ کو اس کتاب میں جہاں ادب، تحقیق اور صحافت کے "دیوؤں" کا تذکرہ ملتا ہے، وہیں آپ کو ان کے بارے میں لکھاری کے جذبات اور تاثرات بھی پڑھنے کو ملتے ہیں۔ یہ بہت عمدہ پڑھنے والی کتاب ہے۔

یہ ڈاکٹر سلیم اختر مرحوم کے بھارت سے ماریشس تک کے سفر کے احوال ہیں اور انہوں نے اپنی روایتی برجستگی سے ہی انہیں بیان کیا ہے۔ اپنے اسلوب میں وہ صرف مقامات کا ہی نہیں، اپنے تجربات اور احساسات کا بھی بیان کرتے چلے جاتے ہیں تو پڑھنے والو کو ان جیسا ہی لطف محسوس ہو رہا ہوتا ہے۔ پڑھیے دوست۔

قیصر عباس صابر صاحب سیر و سیاحت کے شوقین تو ہیں ہی، مگر چاہتے ہیں کہ آپ بھی ان کے ساتھ ساتھ ہی ہمراہی کرتے رہیں۔ یہ ان کی پاکستان کے لیجنڈری شمال کے سفر کی داستان ہے۔ ان کی دوسری کتاب، جنت زمین پر بھی پڑھنے والی ہے۔ دعا ہے کہ وہ لکھتے، مسلسل لکھتے رہیں۔ اور ہم انہیں پڑھتے، پڑھتے رہیں۔

باری علیگ مرحوم بہت جلد اس دنیا سے چلے گئے۔ وہ بہت شاندار لکھاری اور محقق تھے۔ وہ اردو زبان کو بہت سے تحفے، اپنی بہت مختصر عمر میں ہی دے گئے۔ یہ ان کی اسلامی اور مسلم تاریخ پر اک بہت دلچسپ اور بہت تیزی سے پڑھی جانے والی کتاب ہے۔ پڑھیے اور تاریخ کے ساتھ ساتھ اس سے جڑے معاشرتی معاملات کو بھی جانیے گا۔

یہ بہت شاندار کتاب ہے اور آپ کو بابا جناح سے اک بہت مختلف انداز میں متعارف کرواتی ہے۔ پروفیشر سعید راشد علیگ نے اسے بہت محنت اور بہت تحقیق کے علاوہ، بہت دل سے بھی تحریر کیا ہے۔ اس میں تاریخ تو ہے ہی، اس میں محبت بھی ہے۔ آپ کو یہ کتاب لازمی پڑھنی چاہیے۔

پڑھیے وہ شاندار، جاندار اور تاریخی جنگ اور ہماری دھرتی کے ہیرو، راجہ پورس کے بارے میں۔ راجہ پورس وہ پہلا شخص تھا اور اس کی فوج پہلی فوج تھی جس نے سکندر یونانی کو بھرپور مزاحمت دی۔ اس جنگ میں سب سے پہلے دستے کی قیادت، پورس کا بیٹا ہی کر رہا تھا۔ کیا ہی شاندار بات ہے۔ آپ کو یہ کتاب لازمی پڑھنی چاہیے۔

دینہ میں پیدا ہونے والے سمپورن سنگھ کالرا سے کون واقف نہیں جو اردو کو نجانے کب سے "گلزار" بنائے ہوئے ہیں۔ ان کے کسی تعارف کی کوئی ضرورت بھی ہے بھلا؟ یہ ان کے تحریر کردہ شخصی خاکوں کی کتاب ہے۔ پڑھیں گے تو ان کی نثر کے جادو اور نشے میں جھومتے رہیں گے۔

راجندر سنگھ بیدی اردو کے کلاسیکی مصنفین میں سے ایک ہیں اور یہ ان کے اک پکے عاشق، مشتاق احمد کی محبت کی محنت ہے۔ یہ کتاب آپ کو راجندر سنگھ بیدی سے ایسے متعارف کروائے گی کہ جیسے آپ نے انہیں پہلے کبھی نہیں جانا ہو گا۔ پڑھیے کہ یہ اردو ادب سے محبت کرنے والے کا تحفہ ہے۔

اعجاز احمد یوسفزئی آپ کو پاکستان اور افغانستان میں آباد پشتون سماج، تاریخ، رسوم، رواج اور تاریخ میں ارتقا کی نفسیات کے بارے میں بتاتے ہیں۔ پڑھنے کو یہ اک شاندار تاریخی، سماجی اور معاشرتی کتاب ہے جو آپ کو پشتونوں کے بارے میں بہت عمدہ معلومات فراہم کردے گی۔ پڑھیے دوست۔

یہ کتاب آقا محمدﷺ کے فرمودات پر مبنی ہے۔ اور بس یہی تعارف کافی ہے۔ پڑھیے جناب۔

پڑھیے اس خطے کے بارے میں جس کی تاریخ ویسے نہ لکھی گئی جیسا کہ حق تھا۔ خطہ پوٹھوہار کے ہی اک فرزند، راجا امجد منہاس نے اپنی دھرتی سے اپنی محبت کو مکتوب کر کے امر کر دیا ہے۔ یہ کتاب اس خطے کی شخصیات اور علاقے پر اک جاندار اور تاریخی تعارف مہیا کرتی ہے۔ پڑھیں اور لطف اٹھائیں۔

ڈاکٹر ذاکر نائیک نے اک ایسے موضوع پر اپنے زاویہ سے لکھا ہے جو نہ صرف مسلم معاشروں، بلکہ دنیا کے تمام معاشروں میں موضوع بحث رہتا ہے۔ یہ بہت مختصر مگر پڑھنے والی کتاب ہے۔ آپ بھلے کتاب سے بعد از اتفاق نہ کریں، تو بھی مخلتف خیال پڑھنا مفید رہے گا۔ پڑھیے جناب۔ پڑھتے رہا کیجیے۔